肉絲炒魚翅瓜　爽口清甜

新春過後，梗要食番啲無咁肥膩嘅餸菜清清腸胃，以下介紹嘅肉絲炒魚翅瓜係一個唔錯嘅選擇。一絲絲嘅魚翅瓜爽口清甜，配以有咬口嘅肉絲及營養豐富嘅甘笋絲同炒，呢個餸唔單止好味咁簡單，賣相重相當吸引，且老少皆宜！

記者、示範及攝影：陳冰麗

材料：
魚翅瓜12両　豬肉絲4両　甘笋絲少許　紹酒1/2湯匙　薑絲少許　
汁料：上湯或水4湯匙　糖、麻油、生抽各少許

做法：
1.魚翅瓜切一半，以大火蒸約10-15分鐘，攤凍後去核，以叉將瓜肉刮出成絲。
2.豬肉絲加少許鹽、糖、油、粟粉及水拌勻。
3.爆香薑絲，加入豬肉絲及甘笋略炒，加紹酒炒至豬肉熟。
4.最後放入魚翅瓜及加入汁料煮至滾即可。