雖然今屆法國巴黎車展，要到今年九月先至舉行，但歐洲方面經已傳來消息，謂福士車廠將於車展會場內，展出一款全新兼名為Touareg嘅四驅車，並視平治M-Class及寶馬X5為敵。
該消息指出，Touareg將有多個引擎配搭，當中包括有入門版嘅3.2公升V6型號（馬力240匹）、來自奧迪嘅4.2公升V8型號（馬力315匹），以及旗艦級型號所用嘅6.0公升W12引擎（馬力420匹），加上一套四驅系統，從而令新車可有不錯嘅性能表現。而賣相則預計會與快將推出嘅Phaeton旗艦級車系相似，車內設備亦甚為齊全，當中包括有真皮車廂布局、全新恒溫冷氣系統，亦能讓乘客可以感受到一個舒適愜意嘅旅程享受。各位有興趣嘅車迷，不妨拭目以待喇。