美股前晚嘅跌勢由科技股拖累，但港股噚日嘅跌勢就由銀行同地產股帶動，滙豐（005）沽壓其實相當厲害，股價雖只跌1.2%，收85.75元，但成交足足有6.1億元。有芬佬話，喺滙豐公布業績前，仍會有基金出貨，因為阿根廷撇帳問題，對滙豐係一個頗大嘅不明朗因素，反而公布完業績後，會有機會反彈。
國內股市下周重開，噚日有人博AB股紅盤高開賀布殊訪京，鋼鐵股成為追捧對象，馬鋼（323）升5.3%、鞍鋼（347）升2.9%、重鋼（1053）升4.2%。
繼英傑事件後，噚日又發生新大利事件。香港經濟低迷，證券業出現長期不景氣，證券行已經好難靠一般嘅經紀業務搵食，而最近證監會又開始落力巡查，呢類事件可能會一浪接一浪爆出嚟。i師傅話，由於證監會加緊巡查，證券行孖展業務將進一步收緊，短期內莊家股都好難再大炒。
至於早前提過將於短期內開車嘅東君科技（362），會唔會受到影響就真係難講嘞。不過線人話，條水來自大陸，根本唔需要孖展，更何況家陣證券行都好少會借錢畀中資炒股啦。此股噚日逆市上升2.3%，都算企得好硬淨。
長城數碼（689）供股僅獲80%認購，包銷商第一證券需要上身，包銷12.5億股，以每股供1仙計，約值1250萬元。此股噚日被掃高至2.1仙，升幅達23.5%，不過，長城數碼成交額長期偏低，包銷商要全身而退，一定要諗計。