最近小初發覺一件事非常之離奇，希望各方友好如果知情，請予賜教。
話說生產照明用品嘅雅域集團（1229），舊年曾5送1公司輪845，隻輪自從舊年9月掛牌後，由14仙水平一路猛升，尤其喺舊年11月升勢最急，升至最高2.20元，跟住就穩定喺2元水平。
隻輪通常下午三點零鐘時，就會見到有幾萬份成交，總之就係要收2元。隻輪行使價係1.23元，大升水成298%。
至於正股方面，就一直維持喺70至85仙上上落落。近排冇乜特別消息，只係早幾個月前傳過，話可能會批股，但結果做唔成。此外，以前都傾過吓賣殼，但近呢半年都唔覺有類似消息出現。
究竟點解雅域正股股價冇咩異動，但隻輪又mark得咁勁呢？由於成交稀疏，又唔多似散貨，中間係咪有咩特別原因，實在令人疑惑，小初還望有高人可以指點迷津。