中石油（857）跑輸畀其他兩隻油股，收1.43元，跌3仙。
中石油Call輪9070，每份輪兌1股正股，跌2.5仙，價位跌幅幾乎跟到足，跌得過分，最低21.7仙，創出爐以來新低，收22.2仙，跌幅10.1%，就咁打入死火榜，做咗阿4。
3大石油股嘅Call輪，交投最旺係9070，是日有41球易手，佔發行量超過1成。壽命好長，足足重有11個月可賭。溢價3%，槓桿率6.4倍。
中海油（883）最熱門嘅Call輪係9175，11月夠鐘，現價97仙，溢價9.3%，槓桿率8.7倍。9070拍埋9175，靚晒。中石油收市前15分鐘，1.43元沽家有成20球，到尾忽然全部down牌，得番20萬股掃剩，已見底，9070博反彈，係時候矣。3日前高位28仙，反彈上嚟大把水位。
九倉（004）升40仙，3隻Call輪升幅由6.8%至9.5%。
計數買輪，最正係9190，11月到期，現價31仙，溢價5.6%，槓桿率5.7倍。弊在成交太疏，幾乎全部買賣牌由莊家掛晒。