年初四，賓架L召吃午飯，到陸羽三樓飲茶，每年呢個時候，都要到陸羽飲茶派利是，左丁山當日雖然未開工，亦不便推辭，俗例難免嘛。其實每年最大嘅利是支出，唔係派畀啲未婚親戚、仔女，而係到馬會、陸羽之類經常到嘅地方派畀夥計。
餐廳羅派完利是，竟然同左丁山講大學教育，原來佢睇到《南華早報》邵新明嘅每周專欄，文章認為浸大應與城大合併，教育學院由中大港大接辦，嶺南改為兩年制，又話香港大學生畢業率高達百分之九十八點五，屬於太高，梗係唔捨得踢走啲資質差學生啫。餐廳羅問左丁山有乜回應，香港大學教育係唔係好渣。
若果話唱衰香港，呢篇邵新明大作都可以話係威力大。啲鬼佬唔識中文，好多只睇《南華早報》，啲作家寫乜，佢哋就信乜，好影響本地大學生到跨國公司求職嘅機會。不過左丁山唔係教育專家，只能留番啖氣去聽吓啲大學教授點樣同邵新明辯論先。
一樣知道清楚嘅，就係香港學生入到大學就好少話中途退學，一定堅持到底。但美國大學就唔同，到咗二三年級，因種種理由而退學或肥佬走人者，不知凡幾，所以畢業率低於香港，但係睇番吓哈佛耶魯等一流大學嘅畢業率，同香港差唔多啫，一樣咁高；譬如加州大學每年收州內學生比較寬鬆，到二年級就肥走二千幾人，畢業率一定低一啲。各地情況唔同，不可一概而論嘅。