美股勁升近200點，但港股喺失業率急升至6.7%，以及財政儲備可能會喺2008年用清兩大陰影下唔多識升。有個芬佬同阿虎講，上述兩個消息喺下午開市前已經收到風，其中財儲走勢預測最為觸目驚心，雖然擺明係港府想出口術嚇人，為減公務員人工鋪路。不過，作為專業基金經理唔可以對呢個預測趨勢視若無睹，起碼都要作出適量減持，先至可以對客人交代。恒指未能突破10800關口，後市可能繼續轉差。
宏安（1222）噚日除權後大幅上升41%，收報4.1仙，較供股價3仙高出37%。黑客話，此股先前一直被壓在3仙供股價以下收集，主要為咗供股權上市時炒鋪勁，正股亦會被托高，至於會唔會為吸引股東供股，托到截止申請認購供股為止則好難講，跟炒就要自己執生嘞。宏安早前宣布1供4，發行逾65.76億股新股，每股供3仙，另外每供4股送1股。
數字地球（109）果然勁升，幅度更達到25%，但正如前日所講，升到呢個水平便要執生。同系山河控股（8127）亦大發神威，升21%，似乎係想顯示莊家本身財政實力仍然強勁，不過成交則略嫌稀疏咗少少。
瑞源國際（476）最近發生過懷疑遭人斬倉事件，曾被人質至1仙都冇人接。e莉莎話，最近好似有個中資大戶入市維持秩序，噚日收市時喺1.2仙掛入嘅買盤達到1.5億股，陣容可算鼎盛，若有興趣炒仙士股，或可考慮此股，每個價位0.1仙，即係話每升1個價位升8.3%。