政府鼓勵港人北上發展，各行業亦在內地尋找商機，需租用物業，自然要知道行情，蘭西剛收到戴德梁行嘅物業報告，見有多個內地城市嘅樓市分析，除最多人關心的北京外，重有天津同大連等，資料都好詳盡，包括寫字樓、住宅及店舖嘅供應同展望，而且重有埋一啲個案供參考，相信啱北上人士。原來戴德梁行響北京、上海、廣州、深圳、大連、天津、重慶同杭州都有辦事處，唔怪得有咁多料。
中原地產在農曆年前，有13家分行一晚內遭到破壞，但好快就重新裝修好繼續營業。蘭西同中原張奕威傾開，佢話損失只係10幾萬，同事都冇受影響。但原來重有下文，就係第日交保費時，肯定會加價，即要畀多啲保費。聽講全港地產代理行，續保都要加保費，細行就真係「百上加斤」。
現時賣樓蝕讓已是平常事，而即使賣居屋也要蝕本離場。鴻運地產區智禮話，粉嶺欣盈苑F座高層4室，827方呎，以83萬元易手，每方呎1004元，雖然是第二市場成交，不用補地價，但業主仍要蝕5萬元。
蘭西