新車速報：<br>本田Mobilio慳油小型七人車

新車速報：
本田Mobilio慳油小型七人車

承襲家庭RV車走勢方興未艾，本田車廠繼推出Stream之後，早前佢哋一部講求時尚別致嘅Mobilio七人車，亦正式面世。雖然香港代理未有考慮引入，但呢部用上較Jazz高一級i-DSI新偈嘅Mobilio，經已有車行火速到港；賣相除入時夠Cute外，佢重有RV車同MPV車靈活及載客量高嘅長處，用佢嚟日常代步，自然係最佳拍檔喇！

記者：陳偉林　攝影：陳偉強　ImageGirl：Natalie

賣相別致又吸引
呢部有別一般家庭RV車嘅Mobilio，擁有方匣子嘅造型之餘，佢嘅車高重比普通RV車多出一點，形成一個車窗闊落又Cute嘅賣相外，難得佢重有電索式雙趟門組合，給後排乘客有上落方便嘅好處㖭！



座椅靈活多變好用
車廂三排七座位配搭，後排可以收摺於中排座墊下，令尾廂空間倍增，皆因佢用上跟Jazz近似嘅車架結構，而油箱亦同樣移前於車軸之間；若有需要，中、後排重可以放平成卧鋪㖭！除電窗、電鏡及中央門鎖外，原廠音響及冷氣一應俱全，重有雙安全氣袋同前後三排獨立房燈㖭！



i-DSI偈低轉扭力驚人
咪睇Mobilio咁高大，查實佢只係配用一台1.5公升SOHC偈而已；之不過，佢跟Jazz一樣，係用咗本田至新嘅i-DSI引擎組合，雖然馬力輸出一般，但低轉高扭力輸出特性，令佢起跑及加速，好有一分剛勁感。而穩紮及低重心嘅車架設計，重畀到人有循迹性高嘅走彎能力㖭！不過想部車保持爆力強及慳油的話，佢每汽缸雙火嘴編排，就要定時檢查及更換喇！

記者試後簡評 優點 外形： 高個子身形趣致，又具備多用途車嘅特點。 車廂： 三排七個座位空間尚算闊落，日常代步購物至合意。 設備： 一般家庭車配搭齊全，左右電趟門上落夠方便。 操控： 高個子但有低重心編排，加埋一台低轉高扭力嘅1.5公升i-DSI新偈，起跑加速有力。 缺點 1. 車廂三排座椅設計，略嫌後座腳部空間狹窄，較宜孩童乘坐。 2. 對應香港酷熱潮濕嘅炎夏，中、後排欠缺冷氣送風口。

本田Mobilio規格 引擎： 1496cc直4SOHC 馬力： 90ps/5500rpm 扭力： 13.4kgm/2700rpm 傳動： 無段變速CVT自動波，前輪驅動 懸掛： （前）柱式獨立　（後）扭力連桿 制動： （前）透氣碟　（後）鼓式（ABS） 輪胎： 185/65R14YokohamaAspec 尺碼： 4055×1685×1705mm 軸距： 2740mm 車重： 1260kg 平均耗油： 17.0km/L 新車售價： $146,000（標準版） 車輛提供： 富利堡汽車（28776700）