今次真係出事喇！早前我求大俠睇到中國第六期足彩開出呢個禮拜嘅秩序時，都已經覺得唔係好妥，因為改咗去下月十三日打嘅布力般對葉士域治呢場英格蘭超級聯賽，竟然有份，但係足彩方面之前話過唔會再以攪珠嚟定戰果，咁唔通要等到三月中至開獎？
經過一輪明查暗訪後，原來呢場波最後都係要攪珠嚟定戰果，因為有關方面話要推到咁遲至開獎太不切實際，所以惟有攪珠，重話希望彩民見諒喎！我求大俠唔係話教人哋做嘢，不過牽涉喺足彩嘅投注同埋彩金等等，數目絕對唔細，有關方面喺開出秩序時，可唔可以先求證一吓呢！畢竟，攪珠只求運氣，完全冇眼光可言，成日咁攪珠法，咪搞到球迷冇癮，減少投注！
係人都知NBA首位中國外援王治郅嘅英文水皮，不過唔知係咪秘密練兵，最近好似進步神速，前日佢喺小馬嘅球迷聯誼會上，第一次用英文回答班球迷嘅尖銳問題，而且重識得搞氣氛㖭。當時一小球迷問大郅結咗婚未，郅哥突然爆句：「可能喺聽日。」即時搞到班球迷騷動，歡呼聲四起㖭。
本地足總原本安排咗南華對流浪同香雪對晨曦兩場甲組聯賽喺旺角場踢，但主場嘅南華竟然唔怕蝕錢，係都要將場波改喺成十萬元場租嘅大球場踢。總監梁守志話貴租唔緊要，最緊要喺個靚場踢有助贏波。南華為咗贏波不惜工本，真係用心良苦，睇吓係咪真係有效先。
中國國足教頭米路天奴域雖然唔係做官，但係佢講嘢就好似個官字有兩個口。國足備戰世界盃嘅友賽對手，𠵱家重係一片空白，好大程度係受米路佢成日掛住拍廣告、出席其他「分唇」影響，點知佢老人家反過嚟埋怨國足友賽「數量少、質量差」，我求大俠真係想問佢怨得邊個呢？
講起世界盃友賽，就一定唔可以唔提洪都拉斯喇，呢支二○○一年國際足協最佳球隊，自從喺賀歲波表現出色，重攞埋冠軍㖭，好多世盃決賽周隊好似巴西咁，都吼中佢哋球員有質素、交手又「唔拉馬」，紛紛向佢哋招手，難怪佢哋教練盧沙度都話要「ThankyouHongKong！」
真係估唔到，利物浦嘅三位球星奧雲、列納同埋希斯基有愛心之餘，重好有「吉士」，因為佢哋喺星期四去信南韓政府，要求南韓政府要善待貓狗。今夏世界盃主辦國之一嘅南韓係准食狗肉嘅國家，列納就話今夏冇得去日、韓啫，但奧雲同希斯基就肯定會隨隊咁滯，佢哋都敢去信南韓政府，好嘢！