小初最近發現有樣怪事，金禾國際（2917）早前1拆10拆細，但新股票尚未到手之際，竟然唔按傳統智慧炒上，而係一浪低於一浪，不過成交量又唔大，點解有人要沽得咁急呢？
金禾噚日又跌21%，收15.8仙，成交股數656萬股，金額只得106萬元。
經紀黃話，金禾自從舊年以50仙招股後，股價好快就抽上3元，之後有一日突然出現好大成交，原來有幾個巴仙嘅股份轉咗手，據講係有一個基金要咗。小初未出聲，經紀黃就話唔好問點解個基金咁高位都肯接貨。跟住佢繼續講，聽聞個基金近日等錢使，所以頻頻喺市場上沽貨，但有關人等就冇咩意思接貨，所以股價先至喺冇咩成交嘅情況下，愈mark愈低。
不過，小初計過，就算以噚日收市價15.8仙計，仍等於股份拆細前1.58元，較招股價高出好多，因此就算跌得幾勁，都唔好亂咁撈底。