陳豪前晚同胞兄喺跑馬地放狗，兩個大男人拖住隻西施狗仔行街街，畫面幾有趣。陳豪個樣同胞兄好似餅印，驟眼睇埋去，簡直係孖生兄弟咁。陳豪戴住頂紅色cap帽，一身便服行前，佢哥哥拖住寶貝西施狗緊隨後面。
記者噚日致電陳豪，佢話：「隻狗個名叫SitSit，係哥哥嘅，本身我都好鍾意狗仔，但自己做呢行，時間好唔固定，我怕冇時間打理，所以都唔敢亂養。噚晚（即前晚）我同哥哥食完飯，咪陪佢一齊放狗傾吓偈囉！」
此外，黎小田同一位年輕女伴喺跑馬地英皇駿景酒店消遣，佢離開時見到記者影相，唔止唔抗拒，重好合作，小田重猛問記者：「靚唔靚？」然後佢重拎咗有關嗰個女仔嘅資料出嚟，騷畀大家睇㖭！
梁漢文噚日出席電影動畫《冰河世紀》宣傳活動，佢提到早排返內地拍攝《齊天大聖孫悟空》時嘅慘況，佢話：「記得有一場戲去沙漠拍，嗰度好凍，凍到連去廁所時都去唔到。另外記得有一次等埋位時，同李燦森捉棋，但係玩玩吓發現件羽絨都結埋霜呀。」
羅兆輝想靠間慳電機公司翻身，𠵱家有歐美財團睇中佢間公司，翻唔翻到身就睇呢三個禮拜。馮仁昭聽聞劉鑾雄前後借咗近十億畀佢，就算喺羅兆輝自殺之後，劉鑾雄都借咗幾千萬畀佢，劉鑾雄對羅兆輝都算夠朋友，當然希望佢可以翻身再嚟過。
關禮傑早前去咗內地銀川，拍咗一套三十集武打電視劇《斷愁谷》，由於銀川嘅天氣好凍，關禮傑唔習慣，加上佢又有啲思鄉病，所以拍拍吓戲病咗。之後關禮傑同武師練習時，唔小心俾對方整傷左眼眼眉，好彩傷得唔嚴重，未有破相。
胡楓前晚出席無綫喺尖沙嘴美麗華酒店舉行嘅新春聯歡晚宴，重同無綫總經理何定鈞、高層何麗全以及陳文輝，一齊攻打四方城。雖然胡楓同成班高層打麻雀，但絕對冇話因為想討好佢哋刻意鬆章，重喺何定鈞同馮仁昭傾緊偈嘅時候，唔聲唔聲食咗何定鈞一鋪四番牌，認真冇面畀。
趙翠儀噚日出席新城電台節目《投姿有意思》時，好開心話最近做咗業主。
趙翠儀話：「我最近買咗杏花邨，都有六百幾呎，諗住可以同屋企住得近啲，下個月就可以收樓。」
趙翠儀重話：「我會自己做番室內設計，將屋企搞到好有英國復古feel。」