經濟不景，人人都話要節約用錢，慳得就慳，好似一哥曾蔭培咁，噚日佢請班記者到佢位於山頂嘅官邸開新春酒會，同傳媒聯絡吓感情。一哥更帶記者參觀佢嘅官邸，點知八方發現官邸度有一套好面善嘅梳化，一問之下，原來係以前放喺財爺官邸嘅舊梳化。
聽一哥講，因為佢哥哥曾蔭權搬去政務司司長官邸時，並冇要呢套梳化，而新任財爺梁錦松又話套梳化唔多襯佢嘅家具，所以都唔要。一哥話：「既然冇人要呢套梳化，咁我咪要咗佢囉，無謂浪費呀！」佢重話其實套梳化好舒適，有時佢會喺夜晚坐喺套梳化度，一邊聽音樂，一邊欣賞山頂風景，尋找片刻嘅寧靜；唔單止咁，佢重話係呢啲二流宿舍先至襯到呢套梳化喎。
嘩！使唔使咁謙呀？
（圖）一哥話鍾意坐喺呢套梳化度，一邊聽音樂，一邊欣賞山頂風景。
E-mail：