讀者Tommy問：本人是新牌仔一名，現正想為剛購入的座駕打蠟，而本人亦係第一次為汽車打蠟，請問自行為座駕打蠟，有甚麼要注意嘅地方呢？
Tommy：其實為座駕打蠟，係可以保持車身漆油嘅持久性之餘，又可以防止雨水中嘅酸性對車身產生侵蝕作用，而市面上所買到嘅汽車蠟，分別有水蠟、固體蠟及乳蠟；固體蠟嘅持久力和光澤最好，但上蠟和磨光時會較費氣力，而乳狀蠟稍差，水蠟效果則較普通，但勝在方便慳時間。現時市面上有啲混有顏色嘅固體蠟，用途係可以填補車身上嘅蜘蛛紋；不過選擇有顏色嘅蠟時，就要非常小心，因為揀錯顏色的話，車身上就會出現一撻撻嘅蠟紋。另外，如果車身顏色係帶有銀粉漆的話，就要選擇特別嘅銀粉漆，可惜市面上嘅日本製車蠟，多數只有日文說明，所以不宜亂買（若然係淺色車身的話，就更加要小心）。而一般自行打蠟只需打上一層便可以，如果車身油漆日久淡化或滿布花痕，可以先用粗蠟打磨平滑，再用不含蠟質嘅磨光劑打磨，最後打上水晶蠟便可；不過其過程要控制得宜，才能有良好嘅效果。
打蠟過程其實好簡單，就係打蠟同磨光，其巧妙之處係力度嘅使用；首先用一般粗度嘅海綿沾上車蠟，以圓弧嘅方法上蠟；蠟嘅厚度毋須太厚，待車蠟乾透變深色後，再用特幼細嘅海綿或起蠟布順着單一方向磨光起蠟。不過，切記不可在猛烈嘅陽光下打蠟，而為車頭打蠟時，亦要停車待引擎冷卻後才可打蠟㗎。
如果大家對汽車有任何問題，可傳真或郵寄畀我哋，我哋會盡快為你解答。
傳真：27420542
郵寄：香港將軍澳工業邨西駿盈街八號《蘋果日報》副刊「車天車地」版「汽車Q&A」收。