八方老友噚晚去完中聯辦新春酒會，話認真抵去，何解？因為今年滿場飛的唔止一班老人家政客，重有萬人偶像黎明，同阿松緋聞女友葉靜子；有靚仔靚女睇，梗係吸引好多啦。
中聯辦點解會請Leon去新春酒會，Leon話自己都唔知，可能因為參加公益金活動多啩。不過Leon話覺得成個酒會好似拍戲咁，久唔久就有啲大型握手場面，而噚晚的主人家就專業好多嘞。咁又係，點專業都好，大家都係做戲啫！
Leon同班政治記者傾偈，話題都好難離開官場。有人講笑問佢，第日會唔會從政，佢反應不知幾大：「千祈唔好搞我！」重話下一分鐘就會做番藝人，去完酒會就要錄世界盃主題曲，不過走之前，點都要做布景板，企定定同酒會來賓影相影餐飽先。
八方老友轉過頭就見長髮大眼嘅靚女葉靜子出現，不過陪佢嚟的唔係阿松，亦唔係小小超，而係一位頭髮開始稀疏的男人，「發叔」劉皇發嘅助手溫伯鈞！唔係嘛，靜子的taste點會轉成咁嘅？
點知葉小姐重同記者講，叫大家影相記得影埋溫伯鈞，就當佢係緋聞男友喎！不過各位男讀者唔使心痛住，因為靜子後來解釋，溫伯鈞只係多年好朋友，所以各位男讀者重有機會。
呢頭同靜子傾完偈，嗰頭又見到李超人，不過佢好口密，乜都話唔講，只係肯講句新年願望：「希望香港好啦！」
E-mail：