趙飛雲前晚哭完馬喪，兩點鐘昅吓杜指都只係升咗四五十點，點知噚日起身一睇，杜指竟然大升196點，報9941，再度神奇升穿50日線（現處9915），技術走勢似乎又出現轉機。
美股雖然大幅反彈，但港股則好似隔夜油炸鬼，中資股重趁國內減息落實，出現獲利回吐，恒指最後微升39點，表現令人失望。
渣打業績較市場預期差，但滙豐（005）表面上沽壓唔大，只係微跌兩毫半收市，日線圖重出現粒十字星，如果今日以大陽燭上升，將形成利好嘅早晨之星。不過睇埋噚日滙豐嘅沽空成交，竟高達1.5億元，佔沽空總成交一半，暗藏殺機。睇嚟都係吼住滙豐Put輪9034或者9027較為着數。
收市後，港府公布失業率再創6.7%新高，加埋庫務局長俞宗怡幫手嚇人，淡友又有藉口出擊。晨早睇報紙大幅報道港府將大灑金錢，進行6000億元基建，增加就業，傍晚就嚇人話港府7年後冇晒錢。究竟佢哋點樣計劃用錢，趙飛雲真係唔明？
古有名言「非所據而據，非所困而困，身必危名必辱。」老好人乏自知之明，最終結果可能都係累己累人。