謝霆鋒昨出席天梭表發布會，坦承與女友王菲在大年初一於北京相約到廟宇拜神祈福許願，實行以行動證明二人感情穩定。霆鋒更表示與阿菲去拜神已成每年必做的事。
謝霆鋒、傅天穎（奀妹）、蔡曉儀、翁為德及鄒兆龍夫婦等，昨日出席在銅鑼灣舉行的「天梭T-TOUCHGETINTOUCH」記者會，部分嘉賓獲大會贈送T-TOUCH手表，而擔任主禮嘉賓的霆鋒更同時兼得鋼帶及膠帶手表，共值七千七百元，另外還有酬金。
霆鋒早前曾為另一隻名牌手表TechnoMarine拍攝廣告硬照，問他今次為天梭表做宣傳可會有牴觸？霆鋒說：「唔會有牴觸，因為我只係做主禮嘉賓，兩邊都唔係做代言人，希望TechnoMarine以後都會繼續搵我。」
問他會否將其中一隻手表轉送女友王菲？霆鋒說：「我會送畀我嫲嫲，佢今年九十大壽。」
農曆新年期間，霆鋒與阿菲在北京拜神事件曝光，證明二人感情依舊。對此霆鋒直認在年初一與女友去拜神，他說：「我哋習慣每年都會一齊去拜神，當然有許願，不過許啲乜就唔可以講，因為講咗出嚟就唔靈。」
有周刊報道王菲與前夫竇唯復合，霆鋒對於這些傳言滿不在乎地說：「呢啲傳聞唔重要，總之我對所有傳聞都兵來將擋、水來土掩。」
此外，談及前緋聞女友盧巧音因病脫髮，霆鋒亦表關注，他說：「我知佢個病唔簡單，做朋友嘅祝佢早日康復。」
採訪：魯萍
攝影：何國豪