個市淡淡哋，啲資金流向公用股。中電（002）升40仙，鬼子佬啲錢係咁掟落去，下禮拜派成績表有嘢睇。
中電兩件Call輪，9171上禮拜登場，9183昨日出爐。9171升得1.6仙，冇跟貼正股，現價25仙，9月到期，溢價只係1.2%，槓桿率有成12.2倍，非常抵買。雖然話中電一向係唔多郁嘅股份，Call輪溢價應該低啲，但9171嘅槓桿率咁大，正股小小郁動，隻輪都會好勁。假設未來幾個月正股起1成，隻輪就算平水，都值52仙，升幅1倍多，呢啲就係大槓桿率發揮嘅厲害效應。
9183現價25.5仙，溢價3.4%，槓桿率12倍，長個半月命，9171拍埋去靚好多。
另1隻公用股中煤（003）升上10.45元，升15仙。
中煤Call輪9197收1.01元，升10仙，差不多跟貼正股。溢價2.5%，槓桿率10.4倍，正股有勢，9197繼續去。
滙豐（005）最低86.50元，收87元，跌1元。最熱門嘅Call輪9030，收71仙，跌7仙，溢價4%，槓桿率12.3倍。正股反彈有望，可買9030博反彈。