今年啲風水專家話股市金融唔多好，理由就係立春之日（二月四日），五行欠金，無金不能生水，所以屬金行業（據講即係金融、股票、五金）唔多掂，屬水行業（據講即係船務、酒店、漂染、飲食及洗水行業）依然一蹶不振。
是否如此，明年今日各位就會知，𠵱家大家只能靠估。左丁山在新年睇各大報紙，啲風水專家幾乎眾口一詞，人人都咁講，於是好奇心起，拎本萬年曆查吓過往「五行欠金」之年，究竟係點樣。每年立春之日，絕大多數係陽曆二月四日，只係時辰唔同啫。由左丁山有記憶之三十五年前（一九六七年）查起，發覺有十三年係五行欠金嘅，包括一九六七年係暴動年，香港衰到貼地；一九七四年，恒生指數跌到一百五十點，市面蕭條，搵工艱難；一九八二年，戴卓爾夫人在北京跌低，樓市股市開始跌；一九八四年，佳寧風暴之後，經濟不景；一九八九年，天安門血案，香港一百萬人上街，諗起都驚；一九九七年，香港站在經濟高峯，回歸祖國，金融風暴襲港；一九九八年，股市跌到低點，政府入市；一九九九年，樓市小陽春之後再跌到現時。其他冇乜特別嘅欠金之年就係一九七二、一九七七、一九八五、一九八八。今年二○○二亦係如此，點睇呀，最好就係七七年翻版，當時係經濟急速反彈期，股市、樓市、經濟一路旺到八二，有五、六年好景，千祈唔好重複七四、八四嘅歷史呀。