住宅近期交投暢旺，買賣雙方會用盡辦法去傾，以便攞到個好價錢，有時會出現好特別嘅成交價，例如沙田第一城30座中層G室，395方呎，以99.99萬元成交，而唔係齊頭100萬元，呢啲成交價好明顯就係為咗要湊夠好意頭（長長久久）；有啲甚至傾埋元位尾數，好誇張。
美聯物業今日開記者會，講新界樓市，受深圳樓影響最大嘅新界區，唔知今年有冇能力扭轉乾坤呢？另一邊廂，中原地產就響下個禮拜三，搞咗個未來香港房屋政策及地產市道研討會，嘉賓都幾猛料，包括地產大好友瑞銀華寶林奮強、嶺南教授何濼生、地產學會會長謝賢程。講者重有美國俄亥俄大學教授，點解會請佢講，就較令人難明。
踏入馬年，內地物業積極來港展銷，第一個唔係舊年人氣最旺嘅上海，而係首都北京嘅樓盤。呢個二環路崇文門東沙市大街嘅花市棗苑，今個禮拜五響銅鑼灣搞展銷會，推出第二期兩座151個單位，1297至1805方呎。發展商為北京城和房地產開發公司。
蘭西