昨日世紀城市（355）公布收購一間長途電話服務公司後復牌，股價竟然急升15.8%，收4.4仙，但成交唔夠200萬元。小初唔多明，唔通單交易真係咁正，令世城股價急升？經紀陳就話唔係，只係大家一廂情願以為有得炒而已。
世城今次以2500萬元收購一間提供國際話音及傳真嘅長途電話服務公司，雖然世城發行新股支付，每股作價成10仙，較昨日收市價出現大溢價，但所發行嘅新股，佔世城已發行股本成7%咁多。
經紀陳話，由於發行價有溢價，同埋發行新股數量大，有炒家一廂情願，以為批貨有機落喺莊家手上炒作，重有佢哋以為世城股價咁低殘，斷估都唔會有太大沽壓，所以就以為有得炒。
經紀陳話成件事根本唔係咁，佢話問過一啲知情人士，話呢件事同炒家毫無關係，人哋手貨亦唔會批畀莊家，叫大家死咗條心算數。