港股噚日一度下試10700，午市略為喘定，恒指收報10749，跌幅收窄至91點，成交只有57億元。
市場開始憂慮中電信上市會拖累中移動（941）及聯通（762）股價表現。目前芬佬對國內電訊股興趣唔大，只不過因為中移動及聯通在恒指屬重磅股，所以點都要持有少少貨，如果要市場對中電信有興趣，相信定價一定要相宜，而芬佬將要減持中移動及聯通。
聯昌泰（1190）噚日突然急升32%，收報6.6仙。市場傳出此股將有動作跟尾，但此股已經5度延遲公布業績，因此聯交所睇得佢好緊，要做嘢唔係咁容易，所以唔好抱太大期望。
太平洋興業（166）噚日乾升130%，收報0.75元，但成交只有23.5萬元。
噚日能夠喺0.70元以下買到貨少之又少，此股應該重有排上升，不過風險就愈嚟愈高。雖然隻股新買家以1.80元買入29.5%股權，但前股東蔣小姐重有手貨會以平價配售，呢手貨如果掟出街，將會造成一定殺傷力。
東君化工（362）又見有異動，股價近期喺0.40元水平整固完成後，已經彈咗10%，噚日收0.44元。據i師傅話，幕後人士已經開始做嘢，股價有機升破0.50元。
另外，出現異動嘅股份重有數字地球（109），噚日急升14%，收4仙。有線人話，幕後想喺本周五股東大會表決供股建議前做場好戲，但噚日升得太急，如果回落到3.5仙水平，不妨搭吓順風車。