阿董有成七百零九個選委提名佢參選，怕且都係坐定等自動當選，所以噚日佢心情都特別靚，喺中環同傳媒飯局講解完基建大計之後，原本安排佢坐政府船過海去尖沙嘴主持開幕禮，但阿董唔鍾意，想坐吓天星小輪，所以成班記者浩浩蕩蕩咁走去搭船！
喺船上面，阿董話其實六十年代佢讀完書返香港，家住九龍塘，當時佢成日坐小輪返工放工，有時做嘢做得辛苦，吹吓海風都幾舒服，但係做咗特首之後就冇機會坐，所以佢今次同班同事講係都要坐天星小輪而唔坐「天后」號！
有行家同阿董講，噚日見阿牛搵隻狗仔，即係阿「懂愛港」去示威，嚇到佢唔識吠，阿董聽完就同阿「愛港」出頭：「冇道理啊！」重話其實好多嘢公眾會有評價，後來喺另一場合，孫明揚又寸阿牛，話噚日搞到咁混亂，係有人想藉個時間搞嘢！但如果可以一人一票選特首，佢哋就唔使要阿「愛港」出來拋頭露面啦！
E-mail：