袁彩雲同胡杏兒舊年因為合作拍無綫電視劇而成為老友，加上佢兩個都鍾意打邊爐，早幾日就相約去黃澤鋒開嘅「麻辣小喇叭」火鍋店大快朵頤。
因為袁彩雲唔鍾意食辣，老闆黃澤鋒特別推介佢舖頭好出名嘅唔辣湯底「何家雞拼牛尾」，佢話何家雞屬海南島菜，用嚟打邊爐特別清甜。
黃澤鋒重推介新推出嘅美國新鮮肉眼扒，當然唔少得鎮店之寶嘅「大寶丸」拼盤，包括黐孖波、芝士牛丸、花膠象拔蚌丸、蠢蛋同黃金角，而袁彩雲同胡杏兒食過之後都讚不絕口。
袁彩雲話𠵱家唔使拍劇住，所以打算趁呢排日圓低水位，喺呢個月尾同幾個朋友去日本旅行兼掃貨。
葉德嫻（Deanie）噚日接受新城節目《王晶戲語人生》訪問，佢講到出口話好想幫王晶拍嘢，無論電影或者電視劇都冇所謂。而身為主持嘅王晶就即刻話：「佢好高要求㗎，不過我計劃緊開部戲，搵佢去飾演慰安婦。」Deanie即刻好開心咁話：「佢之前都講過，我有興趣呀！我都有做資料搜集。」
梅小惠噚日喺新城電台，同吳剛一齊替薛家燕主持節目《家天下》，佢話因為家燕姐放緊假，所以無綫劇集《皆大歡喜》班演員會輪流做替工。小惠重話佢呢個新年足足肥咗四磅，因為佢日日由朝到晚都係食蘿蔔糕，佢話遲啲要去推脂減肥呀。
韓君婷噚日一個人飛去日本旅行，佢話有朋友喺嗰邊等佢去會合。佢話今次帶咗個空篋、二十萬日圓（大約一萬一千幾港紙）同幾張信用卡去買嘢。韓君婷話佢去過東京兩次，但都未睇得真，所以今次要睇真啲喎。
三月中將會喺紅館開個唱嘅胡楓（修哥），噚日接受商台節目《茶煲裏的查篤撑》訪問，修哥話佢其實一年前就已經知道會開演唱會，所以十個月前佢經已開始練歌同揀歌，佢話𠵱家每日都會喺屋企唱兩、三個鐘頭卡拉OK，重會去緩步跑練氣，話希望以最佳嘅狀態同歌迷見面。
成龍農曆新年期間喺泰國搞咗個fans聚會派對，佢班兄弟好似盧惠光同段偉倫等台前幕後都傾巢而出。
馮仁昭以為佢哋係去同成龍一齊吃喝玩樂，點知聽番啲幕後講，呢次其實係去做苦工，即係去到要幫成龍個歌迷聚會打點，招呼fans，重要搬搬抬抬。不過成龍間公司又有雙糧出，又唔使裁員，福利唔錯，都唔緊要啦！