一直以嚟，筆者曾經喺不同嘅媒介上，向大家推薦歐洲新技術柴油引擎嘅好處：慳油、運轉寧靜，以及低廢氣排放量等等。隨着精確電子燃料噴注技術嘅成熟、催化變換器嘅應用，能令新一代渦輪增壓柴油引擎，可以提供強厚嘅低轉扭力，同埋寧靜嘅運作環境，同時亦完全擺脫我哋對柴油引擎嘅舊印象──沿自維修不善柴油的士嘅噪音及黑煙等問題。
喺歐洲主要嘅汽車市場如德國、法國及英國等國家，柴油車嘅銷售比例已超越汽油車，而德國車廠正在帶領柴油引擎嘅研究發展技術；福士嘅小容積柴油車最具名聲，大排氣量者係平治同寶馬。當中野心勃勃嘅福士，都將在全新大轎車上配用一台全新嘅V12柴油引擎，並要跟德國兩大對手抗衡。而福士喺中國內地也趕在他人之先，率先於本年3月由長春一汽大眾車廠，生產配用柴油引擎嘅Jetta（捷達），主要用作吸引出租車（的士）嘅用家，此舉將會成為中國國內第一部國產柴油車。
歐洲嘅柴油引擎，事實證明咗佢哋嘅清潔性和可用性，一向對汽車廢氣排放規格甚為嚴謹嘅美國，環保當局也在研究推廣柴油車嘅好處。
文：陳自齊
如果大家想與本欄作者談車說事的話，不妨傳真或郵寄畀我哋㗎。
傳真：27420542
郵寄：香港將軍澳工業邨西駿盈街八號《蘋果日報》副刊「車天車地」版「車中人語」收。