有報道話楊揚喺冬季奧運幫中國「零的突破」、攞咗個短道速滑金牌後，起碼袋成百萬，但計我求大俠話以中國政府目前對體育嘅態度，楊揚肯定發過豬頭！
根據國家體育總局嘅獎金制度，楊揚呢塊冬運金牌經已幫佢執咗二十五萬人民幣，加埋其他各大小贊助商嘅獎金，呢位小姑娘起碼袋一百萬人民幣。但係計我求大俠話，佢啲獎金肯定陸續有嚟！
事關中國攞咗○八年奧運主辦權同埋出線○二年世界盃足球決賽周後，點都要話畀人哋知，佢哋對體育係好重視嘅，咁又點會待薄啲為國爭光嘅運動員呢！
重有，前年孔令輝攞咗奧運乒乓球男單金牌，就獲得黑龍江省政府五十五萬人民幣嘅獎勵，而楊揚呢塊牌假假哋都係中國歷史首面冬運金牌，意義咁重大，睇怕黑龍江省政府應該重重有賞。
因心臟病而休養緊嘅利物浦教頭侯利亞，日前話好多謝曼聯領隊費格遜，喺佢養病期間打電話慰問同埋鼓勵佢，佢先至可以好得咁快。不過唔好我話求大俠諗衰人，家陣喺英超聯只有阿仙奴同利物浦有得同曼聯撼吓，都唔知係咪費爵爺費事少個競爭對手，搞到個聯賽冇晒睇頭，先至咁好心打電話去問候老侯嘞。
歐洲足協個官方網頁認真唔掂，夠膽死喺比賽途中整錯祖雲達斯對拉科魯尼亞嘅戰果，一度整咗祖記贏一比○，重要成幾分鐘後先至整番啱個戰果。歐洲足協每年喺歐冠盃同埋歐洲足協盃身上都搵唔少啦，家陣連呢啲小事都做到唔湯唔水，連現場賽果都可以整錯，喺入面打工嗰班友，真係要打PatPat嘞！
迪馬堤奧日前話因傷而宣布提早掛靴，聽落去好似冇乜特別，但查實佢係車路士年半內第二位因傷而提早收山嘅球員（之前嗰個係卡沙拉基）。車仔咁落去真係唔係辦法，佢哋唔單止要畀好貴嘅球員保費，重分分鐘搞到啲大牌球星對佢哋避之則吉，咁又點喺英超聯度發圍呀！計我求大俠話，應該搵人嚟擺吓個風水陣。
求驗客手記逢星期一至五刊出
E-mail: