美股復市跌得勁，港股噚日跌得少。美股周二復市走勢真肉酸，恒指噚日跌少過1百點，已經算好叻。杜指50日線（現處9918）得而復失，果然冇乜好結果，日線圖已出現兩支大陰燭，噚晚就算再出現埋第3隻烏鴉，下試9600支持亦唔出奇，其實美股快啲完成試底，反而對港股有利。
有長實（001）及和黃（013）撐住，恒指尾市收復唔少失地，重守喺10日線（現處10724）之上收市，唔算令好友太絕望，話晒守得穩都有機會反彈，問題係美股未跌完，港股好難起飛腳。
不過，唔知係咪個市跌得深咗，趙飛雲亦開始自己嚇自己，覺得近排大戶沽貨好有韻律，沽中移動（941）及滙豐時就托住長實及和黃，沽長和時就托住滙豐及中移動，好似唔想個市跌得太急，喺度做緊嘢，希望唔係收集緊淡倉，月尾大舉出擊。
中建電訊（138）及海爾中建（1169）靜咗一排後，噚日又見股價異動，兩股升逾6%。有老友報料話，海爾國內高層嚟咗香港搞台灣單合作外，亦為海爾中建帶來好消息，不妨留意隻股走勢，可以候低買些少炒一轉。