早幾日，亞Mark曾經同大家提及過，話今年標緻續有猛車推出，查實又點止咁簡單呢！事關去年我哋曾經報道過，話307車系會有一位新成員加入，一部加長軸距、兼有三排七個獨立座位嘅中型MPV車——307SW，廠方經已落實會響今年正式面世，並且好有機會響嚟緊3月初嘅日內瓦車展中亮相㖭！
呢部新款307SW，車身尺碼跟現行一眾日本中型MPV車接近，車長有成4419mm，兼且有2708mm嘅軸距，令車廂空間變得寬敞之餘，佢重有一個近似天幕式嘅大天窗組合，加埋中、後排可摺叠式自由裝拆嘅靈活度；再者，307SW頂級版重有一台2.0公升偈組合，以𠵱家307車系嘅定價睇嚟，相信日後當新車抵港時，或許賣價會響18萬上落都唔定。係標緻車Fans嘅你，就不妨多等一會喇。