董特首要攞夠七百幾個選委提名，先至去馬交報名表，原來當中隱含咗一個唔多吉利嘅問題，同時揭露咗佢原來真係好迷信。
八方聽講老董在報名之前一日，已經穩取七百零八個提名，整裝待發等翌日去報名。七百零八，發發聲，幾好吖！不過唔知邊個醒目仔忽然諗到，七百零八，七零八落，唔多好意頭喎，於是惟有再發力搵多個提名，冇辦法啦，之前的提名攞咗，唔通叫人收番咩。
結果終於俾佢哋漏夜拉多一個人提名，砌夠七百零九個人支持，而老董報名當日的《文匯》同《大公》等都率先披露了呢個數字。不過當日選舉事務處點完提名之後公布，只係收到七百零六個提名！
另外三個又去咗邊？唉，原來老董係搵到七百零九人支持，但係有三個的資料都未搞掂，又冇諗過選舉事務處做事咁有效率，即日公開提名名單，於是惟有之後補上啦。
八方都想順便讚讚選舉事務處，雖然佢哋好快已經核對好提名，但係為咗八方同班行家，並冇準時五點落閘趕人走，一於等所有行家分批抄完提名名單，成九點後先有得放工；選舉主任彭鍵基法官亦好照顧周到，請晒所有人食西餅，等大家唔會手又攰肚又餓！
E-mail：