中石油（857）硬淨，收1.48元，微跌1格。油價近期上升，中石油跑輸畀中海油（883）同中石化（386），有機會炒落後，跑番快啲，要吼吓中石油Call輪。
中石油新Call輪有3件，即9070、9112同9167。9070交投最旺，有19球易手，其他兩件每件只得兩球，壽命最長亦係佢，呢件最吼得過。現價26仙，溢價2.1%，槓桿率5.7倍，咁長命，咁低溢價，抵買。正股見番911前1.69元個位，9070見44仙，打個折扣都好和味。
港交所（388）逆市升25仙，收11.45元，有機會上試12元。
港交所Call輪，要望多兩眼。最靚嘅係9089，收20.5仙，升0.9仙，未升得夠，8月到期，溢價5.2%，槓桿率5.6倍。同類輪中，冇隻交投夠佢嚟。
和黃（013）散1.75元，Call輪跌幅由4仙至11仙，9097由1.08元散落97仙。溢價最低係呢件，槓桿率唔差。發行量67球，是日有14球轉手，拋售過度，他日反彈必然較勁。