雖然噚日係大年初八，但拜年仍未算遲！民政事務局噚晚就喺會展搞咗個新春酒會，八方都有去湊吓熱鬧，但利市就當然冇得𢭃啦。噚晚個場面都可算星光熠熠，除咗主人家民政事務局局長林煥光出席外，中午交完表嘅董建華同夫人都有到場祝酒，而眾人契媽民政事務總署署長李麗娟就更加好熱情咁招待每位來賓，連小小超李澤楷都畀面到場企咗一陣，都算唔話得！
阿董喺台上祝完酒後，重同台下來自十八區嘅區議員握手，啲區議員除咗向董生拜年外，重乘機表達吓意見，而阿董亦循例話佢會記住。其中有沙田嘅區議員話：「董生你未巡區噃！」搞到佢老人家有啲尷尬。
八方乘機伸隻手同董生握吓，發覺佢隻手真係好厚肉同好溫暖，不過就似乎濕濕哋，再望真啲，佢嘅額頭亦冒出點點汗珠，唔知佢係握手握到出汗，定係一時間聽咗太多區議員嘅要求，有啲吃不消呢？
E-mail：