董建華其實真係幾黑仔，上場咁耐香港衰足咁耐，噚日正式遞交競選申請，港股竟然跌162點，恒指一度連10800關口都要失守，馬年首兩日升幅幾乎盡付東流。唔知佢正式連任嘅時候，港股又要再跌幾多點呢？其實阿虎都支持阿董，不過佢真係太過黑仔嘞。
中國興業（132）前日見中銀證券掃貨後，噚日即刻停牌，表示將會供股、發可換股債券及重有收購跟尾㖭。
聽線人話，今次會大額集資收購資產，之後將會有動作跟尾，做番場好戲畀大家睇，叫阿虎唔好成日睇死隻股咁話。
太平洋興業（166）宣布，投資者張宇明以每股1.81元向大股東蔣麗莉等收購29.5%股權，總代價約1.53億元，每股作價較停牌前有溢價4.57倍，睇落似係想托高股價，噚日股份復牌完全冇沽盤，想追貨都唔得。
黑客話此股早已歸晒邊，已經冇街貨。不過新買家買咗手貨之後，一定想做嘢，可留意此股後市嘅表現，初期可能會有少少貨散出嚟，如果股價唔係抽得太高，可買些少搭吓順風車，但當成交大增時就好出貨嘞。
飛達帽業（1100）噚日宣布獲美國國家級賽車體育聯盟授出帽品獨家生產權，呢個消息都幾有刺激性，睇真啲原來隻股唔聲唔聲已經由去年初嘅1.05元水平升至噚日收市嘅1.86元，其間冇咩成交，屬乾升，如果突然有人散貨，相信會跌得好勁。不過此股業務頗為獨特，而且獲得專利品牌，毛利率應不俗，有一定芬佬捧場客。