恒安邨街市可以話係馬鞍山區內一個比較耐嘅舊屋邨街市，超過十三年，街市雖然裝修簡陋唔多光鮮，但行過至知原來係禾稈冚珍珠，內裏賣嘅除咗一般大路肉食蔬果，重有一啲較為有特色嘅急凍食品，呢度嘅魚泡保證新鮮，唔係好多街市常有㗎，而蔬菜就最抵，又平又靚，選擇又多。
記者：陳冰麗 攝影：關文慧
呢個檔口主要以出售新鮮魚為主，其中包括有大魚、鯇魚、生魚、山斑魚等等，而唔係經常有得賣嘅新鮮魚泡，呢度都可以搵到，皆因大魚、鯇魚係每朝早即劏，所以魚泡都零舍新鮮，一份只係$10，買返去打邊爐或炒食都相當不俗，價廉物美。鍾意用生魚煲湯嘅話，檔主劉太建議大家買野生生魚，啖湯唔腥之外重零舍鮮甜，價錢雖然比養魚略貴啲，但物有所值。(10號舖)
Size較長而細嘅係鯇魚泡(上)，比較圓及大個嘅則係大魚嘅魚泡(下)，食落較煙韌。售價兩者都只賣$10份，一份大概有十至十二個。
山斑魚係滋補物之一，以往至少都要$5両，家陣則愈嚟愈平，平均每斤只係$20-$24，以山斑魚配淮山、芡實一齊煲，畀小朋友飲有健脾開胃作用，而病後體虛飲山斑魚亦甚佳。
呢度啲生魚條條生猛精靈，野生生魚花紋較多及細密，每斤$24-$32，飼養生魚花紋較疏，每斤$16-$20。
街市內有兩、三間凍肉舖，但呢檔貨品種類較多。由南非入口嘅象拔螺片，係煲湯、火鍋首選，每磅只係六十零蚊，比起要百零蚊磅嘅象拔蚌經濟得多。另外，呢度啲雞全翼、雞髀亦相當平，分別只係$5磅及$11/5隻，全部重係來路入口巴西貨，品質有一定保證。重有由原裝日本進口嘅冰皮蟹子丸，$20磅，皮薄有蟹子餡，爽口清甜。(4號舖)
象拔螺片宜煲湯
象拔螺片煲湯，清甜味美，煲過湯後肉質腍身滑，老人家牙力不足適合食用，一包大概七安士，$25，足以煲4-6人分量嘅湯水。
五隻雞髀十一蚊
$11有五隻雞髀唔係好多地方有呢個特惠價，雞髀重係大大隻，重約200克一隻。另外，雞全翼，$5磅有4隻。
呢兩個舖雖然唔同名，但老闆則係同一個人，佢係福建人，姓鍾，身形健碩，街坊都叫佢鍾生，呢度啲菜價錢比其他檔口平，西洋菜$3紮，有一斤十三両重，大大個嘅番茄亦只係$3斤，價錢平，菜種又多，豆類更有四種，鮮蠶豆、蜜糖豆、四季豆、荷蘭豆，價錢由$3-$4斤。(50、51號舖)
蓮藕粗大又粉糯
市價要$4.8一斤嘅蓮藕，呢度只賣$3.5一斤，質素重相當不俗，蓮藕粗大而夠粉糯，無論煲湯或炒食都正。
大番茄半磅重
呢啲大番茄每個半磅重，市價要$4斤，呢度只需要$3，相當抵。