國際米蘭嘅巴西前鋒朗拿度早輪傳出會同識得踢波嘅靚老婆美蘭妮離婚，之後事件不了了之；但我求大俠收到風，話佢哋嘅關係依然唔多好，好似朗拿度𠵱家正喺巴西養傷，美蘭妮冇陪伴左右不特止，重話要復出加盟意大利女子足球聯賽隊蒙扎！
雖然蒙扎同米蘭只不過相距幾公里，當朗拿度第日好番復出之後，同美蘭妮可以夫唱婦隨，增進大家嘅感情。不過，計我求大俠話，美蘭妮今次咁做係想向朗拿度示威就真。
畢竟以前踢前鋒嘅美蘭妮𠵱家只得二十二歲，重係青春貌美，因為朗拿度嘅關係喺四年前掛靴，重同佢連仔都生埋。點知朗拿度又唔生性，成日去蒲，搞到美蘭妮把心一橫，決定要喺意大利踢出彩虹囉！
所謂同人唔同命，喺中國國腳後衞孫繼海加盟英甲聯曼城嘅同時，佢嘅國家隊隊友、龍門江津就無望到日本發展。雖然話說日本J聯賽隊東京日視（前身為川崎讀賣）對江津有興趣，但佢哋到𠵱家都未同江津效力嘅泰達隊接觸，而J聯賽喺下月二日就開鑼，睇嚟江津都係暫時唔能「外流」嘞。不過有行家喺早幾日重大字標題報道佢會加盟呢支球隊，唔通啲風吹吹吓就會變事實？
跟官咁耐點會唔知個官姓乜，雲格呢位法籍領隊喺阿仙奴都打滾咗成五年半啦，早知球會高層係孤寒鬼，又點會肯用五千萬鎊嚟買一位球員吖！唔怪得雲格話要阿仙奴個主席希活攞五千萬鎊出嚟買祖雲達斯嘅法國箭頭查斯古特，除非係希活中咗六合彩，否則肯定得個「恨」字！
喺賀歲波有好表現嘅港聯，雖然話五月有機會再同幾支世界級球隊較量，但就視乎有三支定喺四支外隊報名。港聯目前情況就好似打麻將戥腳咁，全程被動。不過，我求大俠就認為喺香港搞大賽，如果主隊冇份，球迷睇波又點會過癮。