港股周一應跌未跌，噚日就跌番夠本，有人賴係董建華報名連任特首所致，趙飛雲則認為係美國周二復市，好友周一偷完雞後，噚日連本帶利奉還。
當然，噚日外圍股市偏軟亦係港股回吐嘅主要原因，投資者驚美股噚晚繼續散，先沽貨離場亦係人之常情。趙飛雲亦掙扎咗好耐，尾市終於決定沽埋香港興業（480）同深圳國際（152）先獲利。其實兩股近期表現硬淨，唔受大市調整影響，算係跑贏大市，不過趙飛雲想減少持貨量，加上有錢賺，所以沽咗先。
太平協和（438）尾市跌近目標價，0.67元先撈番5萬股，如果再低兩三個價位可以再買多5萬股。技術上，太協喺0.66元應有不俗支持，值得博反彈，加上隻股中長線看好，趁跌市低位撈番應有着數。
市場傳聞中石油（857）計劃收購和黃（013）旗下赫斯基石油上游業務，雖然噚日和黃股價仍偏軟，但66.25元係和黃近期低位，守得穩可博反彈。