財爺梁錦松噚日出席全新郵輪《星河公主號》嘅處女啟航儀式，期間發生咗一段小插曲，就係有記者博到盡，喺採訪阿松時不慎跌落水，好彩只係跌落郵輪上層嘅小泳池裏面，唔係跌咗落海！
話說阿松上船同船長寒暄之際，眾記者同攝記急忙跑到上層的小型泳池旁，希望以高位取景影相。當大家集中精神影相時，突然傳來「撲通」一聲，原來一間報館嘅文字記者跣腳，跌咗落水。現場有嘉賓立即講：「香港啲記者真係博嘅！」又有人話見到阿松指住個記者笑笑口咁話：「水為財！」。
現場有另一間報館嘅文字記者用數碼相機影到阿松指住人笑嘅相，重話會將張相傳晒畀所有行家，實行造福人群喎！至於跌落水嘅記者「獲救」後，冇耐就唔見咗影，唔知佢係咪怕瘀，所以走咗呢？
E-mail：