近期，德國平治C-Class有大量新車湧現，想要突出個性與人有分別的話，倒真係要花點心思同金錢替座駕粉飾一番才可。就正如呢部平治C320咁，除加有鮮見嘅包圍外，重有大口徑跑車胎軨及雙出式尾喉配搭，嗰分柔中帶剛嘅性格，確實令人留有深刻印象㗎。
記者、攝影：陳偉林 車輛提供：ArtSports（28588999）
車廂鋪排未有多大改動，皆因C-Class一分時尚美態，經已不用多加修飾；惟有駕駛席嘅腳踏卻換上Brabus金屬部品，除有一分High-tech感外兼有防跣腳功效，令操作變得更踏實㗎！而為咗令夜間有較佳嘅照明及奪目感，車頭一對大燈重換上有6000K嘅Xenon車燈配搭，簡直予人有一分炯炯有神之感㖭。
由於車子本身經已有不錯嘅性能演繹，故內裏改動不大，僅換有原裝位Racing高透氣風隔，而四輪更換上Racing化矮彈弓組合，從而亦有助低重心，強化攻彎嘅循迹力；至於雙出式尾喉配搭，除外觀吸引之餘，中、尾段嘅加速力亦較前提升不少㖭！
呢部經過強化改裝嘅平治C320，之所以受人矚目，相信會係佢裝有一套鮮有嘅FabDesign全車包圍之餘，重有車尾雙出式尾喉配襯，亦能盡顯其獨特個性。而四輪18吋跑車合金胎軨，更配有高性能嘅前輪225/40ZR18，後輪255/35ZR18嘅PirelliPZeroRosso輪胎組合，嗰分柔中帶剛嘅神采，確實令人一見難忘呢！
1.加有全車包圍嘅平治C320，造型獨特並帶有多一分剛勁美。
2.原廠避震配合矮彈弓安排，加埋18吋合金胎軨配搭，明顯走彎時有出眾嘅循迹力。
1.過大胎軨組合，對起跑及走彎靈活性有影響；而雙出式死氣喉無助低轉加速力，僅對尾段有幫助。