話說今年大年初一，八方忽發奇想，晨早八點驅車去深水灣ColdCall超人李嘉誠，同佢拜個早年，順便問吓今年經濟點睇，以同讀者分享。不過李家保安話超人已出門。八方於是去飲茶，十點再造訪，保安則說李生不在港，惟有留低名片歸家瞓覺。
放完新年假，初七返工，即接到超人私人秘書來電。佢話：「李生好多謝你年初一去佢屋企，所以有封紅紙想畀你，但知道礙於公司規矩，可能唔收得；不過，李生話紅紙係中國人習俗，應該無問題，我派人送去你公司好嗎？」
過咗冇耐，有位西裝筆挺嘅男士到咗將軍澳《蘋果》大樓，好有禮貌咁將封利市雙手交畀八方。咁派利市法，真係夠氣派。
其實，八方係可以收利市嘅。通常會將啲錢捐畀「蘋果日報慈善基金」，然後屈啲老細攞等額嘅錢請同事飲茶。呢個辦法相信成日捐錢做善事嘅超人都唔會反對；無論點，多謝晒。
E-mail：