最近日本人氣手機網站「impress」舉辦了一個「2001年手機選舉」，由六千位網民選出全年最受歡迎的手機，其中第1位正是紀香姐瞓身力谷的J-Phone影相手機。雖則日本手機響香港暫時唔用得，但預計喺今年年底本港開通的3G網絡中，據聞和記已向日本廠商NEC訂購了大Lot3G手機，東瀛手機真係隨時殺入香港。
記者：招佩珊
去年日本推出的影相手機共有7、8款，用家可以直接影低數碼相兼即時Send畀朋友。其中呢部J-SH07成為唯一入選十大兼以頭位帶出的影相手機，全因有藤原紀香呢位代言人瞓身力谷，連續幾期J-Phone宣傳刊物封面都揸住佢嚟擺Pose，明星效應加功能強勁，隨即成為全年最受歡迎手機，拋離第2位差不多400票。
排名亞軍的KX-HV200，因能配合網絡商DDI所提供的「AirH」數據傳輸服務，穩定接發數據資料，較少出現斷線問題，所以當選。原因日本地鐵禁打手機，所以唔少人喺搭車途中經常用手機㩒㩒㩒，上網睇天氣、財經、購物等資訊或下載歌仔ScreenSaver，咁接收穩定的手機自然受歡迎。
只要有部GPS機，便可接收經人造衞星所傳送的資料，即時Check到身處位置；如果輸入目的地，重會有路線教埋你點行。正因為呢個功能，全新型號的GPS手機C5001T可以進佔人氣榜的第3位。
成為全球首推3G網絡的日本，十大手機中竟然無3G手機份。當中兩部3G機PanasonicP2101V排13，NECN2002排第28，原因是無論機價及服務月費，都較一般手機貴，而且軟件問題導致回收頻繁，未得用家歡心。