初三赤口唔使去拜年，正好約埋班舊同學，一年一度大飲茶，你開吓我玩笑，我踩番你兩腳。不經不覺已經畢業了十年有多，見到啲同學全部都經已成家立業，有幾個重拖男帶女，內心不免有幾分欷歔，但同學在我耳邊細細聲講：「唔使羨慕我，我重羨慕你。」
有人提議去車公廟轉風車，但另外一個提議就更有建設性，不如去黃埔嗰個嘉年華玩機動風車轉餐勁。
真係遠睇唔知咁架勢，入到去先知咁墟冚。主辦者非常聰明，唔收入場費，總唔信你一場嚟到乜都唔玩，就算你肯，細路都唔肯，香港市民向來餓機動遊戲餓到慌，尤其係啲有番咁上下刺激性嘅，所以處處都見到排長龍。從來都唔知道，過山車、海盜船、大風車、洗衣機呢啲咁大型嘅機動遊戲都可以流動性咁巡迴世界各地，工程都算浩大，抵主辦者發達，聽講上一轉已賺咗億億聲。
最搵銀係啲攤位，十蚊三個波，揼啲冇乜可能揼得中嘅罐，或者圈啲冇乜可能圈得中嘅樽，但新正頭又毋須太計較，求其大家玩得開心，笑口常開。
大夥兒一齊去玩大風車，直情好似俾暴龍叼住咁係咁fing，真係全身上下360度每一個關節都轉勻，轉得咁徹底，今年馬年一定行大運。一於大家一齊行大運。