雖然亞Mark唔係甚麼有名嘅堪輿家，但睇落今年個香港車市，仍然會係歐洲車嘅天下；皆因已知嘅日本新車數目，遠比歐洲新車款為低嘛！就好似靜極思動嘅德國歐寶咁，自代理權易主後，新代理積極重整旗鼓，搞好後勤嘅維修之後，又不斷招兵買馬，最近重搵嚟車行有豐富經驗嘅MichaelShum出掌營業部。聽聞今年嚟緊佢哋又會引入全新Vectra車系，以壯聲勢之餘，呢部中型德國轎車重係佢哋嘅主打車款之一，過往響香港亦曾有一段光輝歲月㖭；據知新車會以一台2.2公升直4偈（馬力145匹）作頭炮，或許遲吓重會有頂級3.2公升V6偈（馬力208匹）都唔定㗎！有興趣改揸歐洲車嘅朋友，不妨拭目以待喇！