和黃旗下新城電台開台以來都冇錢賺，記得舊年財經台開台時，霍大班建寧曾講過，要將呢個搞咗好耐但仍要蝕本嘅項目，由雞肋變成雞髀，但幾時先可以變成雞髀呢？噚日，該台嘅行政總裁甘國亮出席港台新春團拜時就有答案。
甘生話，新城暫時只係變成「老麥」同「家鄉雞」嘅雞鎚，仍未變成佢心目中燒臘舖之中式油髀，但佢有信心雞鎚可以在年中達至收支平衡變成油髀。另外，佢又話財經台𠵱家仍處投資期，娛樂台就表現良好，而到今時今日，佢仍認為財經台嘅成立係正確嘅，並應該細水長流咁投資落去！
另外，畀個貼士大家，未婚嘅甘生係「自動波」派利市嘅，噚日有人祝佢終身美麗時，佢笑得最開心，所以呢個新正頭見到甘生大家識做啦！
E-mail：