永隆銀行前董事長伍絜宜的外孫女、ChristianDior前公關劉清儀，昨日與I.T.才俊譚家和在大會堂註冊結婚，新娘更帶同十歲愛犬Coco陪嫁，可惜註冊條例所限，小狗最終只能在門外見證主人愛的盟約。
永隆銀行前董事長伍絜宜的外孫女劉清儀（Tansy），與網站IconMedialab.com董事、趙曾學韞兒子趙汝琪生意夥伴譚家和（Brian），昨日於香港大會堂註冊結婚。到賀的親友除永隆銀行家族成員外，還有徐濠縈、會計師容永道女友藍思敏和好友蔡綺蓮等。
昨日早上一對新人先在女家向父母敬茶，然後往中環大會堂舉行簡單而隆重的註冊儀式，下午移師跑馬地香港賽馬會會所，筵開七席宴請至親。
Tansy年初八出閣，身穿購自Joyce的紅色連身裙，她喜悅地說：「好緊張，之前瘦咗好多，皮膚又差，要成日做水分mask。噚晚（指前晚）我都瞓唔着，瞓得四、五個鐘。今日最開心係媽咪，佢話終於搵到人照顧我喎。」
問Tansy為何選擇在港註冊？她說：「因為外公（伍絜宜）成九十歲，唔想佢飛去泰國咁辛苦，又想佢同我分享吓，今日（指昨日）係全個農曆年最好日呀！」
註冊典禮上發生一段小插曲，Tansy帶同十歲的松鼠狗愛犬Coco註冊，她向馮國經千金馮詠儀借來一套寵物禮服，為愛犬裝身成陪嫁犬。打扮醒神的小狗甫出現即成焦點，可惜註冊官指法例規定動物不得進入。
而Tansy父親劉啟文更開心，他對女婿讚不絕口說：「Tansy真係有眼光，揀到Brian又後生又靚仔，好！」下月二日一對新人將於泰國Amanpuri酒店舉行盛大結婚派對，宴請近百親友到場觀禮，Tansy屆時會穿上鄭兆良設計的婚紗和兩套晚裝，又會穿上泰式晚裝。其後二人將到新娘子的出生地非洲坦桑尼亞度蜜月。
新娘：
劉清儀（Tansy）
年齡：28
學歷：加拿大多倫多大學修讀FineArts
背景：永隆銀行前董事長伍絜宜外孫女
現職：時裝顧問
新郎：
譚家和（Brian）
年齡：31
學歷：美國CollgateUniversity物理系畢業
現職：投資網站IconMedialab.com董事