富麗花．譜（8176）噚日新登場，除咗第一手成交係招股價樓上之外，就只得一批非自動對盤成交喺30仙樓上，隻股收市較招股價低33%，收20.2仙，又多一隻首日潛水新股。
經紀陳話，聽講揸旗嘅經紀行屬下好多AE面色甚為難睇，一來係累客人輸錢俾客抦，二來係因為之前大佬所講唔係咁，所以感到好失望。
呢個故事教訓大家，如果隻股有得炒嘅話，通常唔會輪到客有貨，如果連一般客仔都有貨嘅話，就更加炒唔起。唉！噚日都話咗隻股街貨多。
另外，世紀城市（355）噚日停牌，小初開頭重以為係同債務重組有關，後來發現旗下百利保（617）同埋富豪國際（078）仍繼續買賣，先知道唔關事。
經紀陳報料話，世紀城市好似話發行新股，收購高科技投資項目，涉及資金唔算太大，但亦唔細，至於有冇得炒就尚未收到風。