古天樂（古仔）早排用咗二千八百萬，購入京士柏山嘅獨立屋豪宅，𠵱家已經開始動工裝修，如無意外下月底可以入伙，聽講佢重搵咗陸宗漢同楊天命兩位堪輿大師睇風水。
古仔買呢間屋，目的係為咗一家人可以住得好啲，佢爸爸三年前中風之後，身體唔係咁好，記憶力好差，性格重變到好似細路仔咁。就好似早幾日，古仔陪阿爸去城門水塘放生，佢媽咪忽然打電話嚟，正當古仔同阿媽聚精會神講電話之際，佢老竇已經唔見咗人！
當時古仔好驚，唔知阿爸會唔會跌咗入水塘，於是佢四圍搵，終於喺水塘附近搵番老竇，原來佢一個人走咗去散步。
其實古仔今次陪阿爸去水塘放生，聽聞係受咗高人指點，話咁樣做可以令老人家延壽喎。
王菲噚日喺北京為賀歲片《天下無雙》宣傳，傍晚佢已經返港。而噚日EMI唱片公司香港區總裁陳志光出席香港電台喺廣播道舉行嘅《香港電台壬午馬年新春團拜》時，亦講到關於天后王菲續約嘅問題。
陳志光話阿菲舊年十月約滿，過完年佢哋會繼續傾，暫時成數未知，不過陳志光話舊年十一月外國老細嚟開會，都話阿菲係好有價值嘅歌手，重會幫佢開拓日本同歐洲市場。另外佢亦否認斟陳慧琳過檔。
亞視藝員部總監陳圖安日前請辭，由宣傳部總監黎文卓頂上，佢噚日喺亞視總台話：「𠵱家亞視嘅藝員中冇明星，呢個現象好奇怪，我會幫佢哋接多啲騷同電影，增加佢哋嘅知名度。」
黎文卓認為亞視需要換血，佢唔排除裁員嘅可能性，重話會用一、兩年時間去栽培兩、三個巨星出嚟，而呢一兩個月就係過度期，陳圖安重會從旁協助佢咁話。
沈殿霞（肥姐）噚日為劇集《我要fit一fit》喺電視城開工，肥姐早排膽管發炎，問佢幾時動手術，肥姐即刻眼濕濕咁話：「後日先再見醫生，開刀係遲早嘅事，欣宜都有打電話畀我，問我重痛唔痛，我都同佢講話無事。不過到時要開刀，佢都會返嚟陪我，我都想手術之後，第一眼就見到佢。我哋相依為命，係咁㗎啦。」
李彩樺（阿Rain）一向對HelloKitty情有獨鍾，就連噚日喺電視城拍劇嗰陣，都自備價值二百幾蚊嘅HelloKitty私伙櫈。問阿Rain緋聞男友林峯有冇送上情人節禮物，佢話：「無喎！佢都無送，大家只不過係friend，唔需要送乜嘢禮物，暫時大家都冇咁嘅意思。不過我十八年嚟都未收過情人節禮物，就連花都冇，平時收得最多都係fans送嘅禮物。」