今年年初三特別多人去馬場，現場聽張基講，有八萬幾人入咗沙田馬場，唔怪得周圍都好逼，買飛亦大排長龍。左丁山到沙圈打個轉，行出去大看台亦覺得辛苦，即刻走番上會員廂座，用現金券落注，費事嘥時間。一位圈內人對左丁山講，沙圈嘅公眾人士看台，有觀眾爭位打交，糾纏咗幾分鐘，雙方見血先至停手；奇怪嘅係唔見保安人員去維持秩序或者阻止觀眾打交。啲保安去咗邊呢？或者掛住去睇住啲騎師啩？
另一怪現像就係咁多人入場，投注唔見得多咗，同平時二三萬人入場冇乜分別！點解呢，唔通各位老友記入場只係為咗睇彭福公園風景？或者趁情人節入嚟拍拖兼買番十蚊單T？人多入場，氣氛的確好好，但啲資深馬迷（真係專心落注嗰種）就覺得人太多反而影響投注。
幾萬人喺馬場，相信最開心嗰位係榮智健公子。榮公子好耐冇拉過頭馬咯，奔騰退役後，佢隻「掌門」唔似會突破，隻「奧運精神」一向表現麻麻，上次唔夠「計得精彩」跑，點知今次跑香港經典一哩賽，竟然輕鬆取勝，重跑出快時間㖭（一分三十四秒八），榮公子兩公婆攞獎盃時，笑到見牙唔見眼，四百五十六萬元頭馬獎金，對榮公子嚟講，都係濕濕碎啫，最緊要就係喺成班董事面前，以董事身份攞番件獎盃！贏完呢場，「奧運精神」幾乎肯定可以進軍打吡，榮大董再有機會威威。