漢寶（228）噚日表現幾醜樣，又話隻股細細粒有人圍飛，但結果都要較招股價低6%收市，報18.8仙，成交唔細，睇落唔多似收貨。呢件事令到小初對今日掛牌嘅富麗花．譜（8176）唔敢抱太大期望。
個名頗為特別，賣護膚產品嘅富麗花．譜，發行1.435億股，每股30仙，全數配售。
經紀陳話本來對呢隻股抱有好大期望，因為股壇大姐大都有幾巴仙股權，所以諗住由佢揸旗必定有一場好戲上演，可惜其後出現變化，擔大旗嘅變成一位來自大馬嘅大哥。小初唔敢話呢位大佬唔得，只係以往領教過一啲唔好嘅經驗啫。
雖然隻股係全部配售，但10大投資者都只係揸咗唔夠50%，即係話有唔少貨出咗街，所以就算有意炒上，恐怕都要收一陣貨。
重有，小初問過所有女朋友，竟然冇幾多個話有用過佢嘅產品，所以都係睇定先。