香港遊客到內地旅遊，坐巴士好似甚為牙煙，新年期間發生巴士意外，死傷甚眾，令人好唔安樂。做遊客嘅就可以話去少啲啫，但做職業導遊嘅就冇法子唔日日提心吊膽。
導遊M中學畢業時，成績麻麻，讀唔到中六，於是到旺角商店做售貨員，之後不斷轉工，做咗十幾份。佢勝在年輕力壯，唔使養家，從來唔嫌薪水低，碌咗幾年之後，卒之俾老友介紹去旅行社跟頭跟尾，跟跟吓就做咗導遊。
佢跟父母到左丁山屋企拜年，問佢點解唔喺黃金檔期帶團外遊，導遊M話：「上次去完南歐之後，再去東南亞，辛苦得滯，返到嚟就病咗，諗住唞番一個禮拜先至再開工，真係損失慘重㗎。」左丁山最唔主張有病夾硬頂住上，有時啲小病譬如傷風咳係會傳染嘅，帶病返工會害咗啲同事㖭。
導遊M話：「你要同情吓我哋至得，做旅行社導遊，我一個月得底薪一千八百蚊，少得可憐，唔夠你喺出面食兩餐陸羽或者鏞記，我唔帶隊出外，就冇貼士或者回佣收入，好唔掂㗎。」吓，咁低人工？唔怪得啲導遊搏命引誘啲遊客去買珠寶首飾藥材土產咯，唔係邊度夠養妻活兒吖！導遊M話：「我未結婚，重係住響爸媽屋企，壓力都冇咁大，結咗婚之後，就得閒死唔得閒病咯。」
左丁山好奇心起，問佢邊類人客最疏爽，導遊M話：「最好就係唔多識英文嘅藍領客，最麻煩嘅就係移民回流嘅西裝友，呢類人特別孤寒。」哦，諗吓就明白其中道理！