近年響歐洲車市場表現突出嘅法國標緻，先後推出206GTi、206CC開篷車及天幕版型號，重有全新307車系，均見大收旺場，佢哋嘅老總JohnnyNg笑顏逐開之餘，亞Mark重聽聞佢之前拉隊請咗班Sales，去日本北海道玩咗幾日作慰勞外，佢重馬不停蹄咁飛咗去法國一趟，跟廠方高層有密偈傾㖭！據知，早陣子曾傳過頂級版本嘅206GTi（馬力達180匹）小跑車，廠方經已落實會正式面世，但日期可能要遲到下半年左右；聽聞新車懸掛、制動等都會有強化改良，就連車廂鋪排同裝飾亦會有變動，不過一套5前速手波裝置將會被保留。相信新款206GTi嘅面世，定會對同級嘅雷諾ClioSport，以及經已落實嘅豐田YarisTurbo，構成一定嘅壓力；而各位206GTi嘅Fans，就要拭目以待喇！