要數王子呢排大跌眼鏡嘅手機，相信都係韓國造嘅「C皇」2000及2200。冇乜特別功能居然賣到成三千八銀，加上個朵又唔響，搵鬼買咩！點知出街後反應奇佳，冇WAP、冇GPRS兼冇歌仔，每日銷量居然可砌低「三叔」拍住「落機呀」，可謂淡市奇機。不過都幾好笑，好多表叔以為佢係國產機，名都未識讀已經磅水。可惜部機唔支援簡體中文輸入吖，否則此機響上邊實一炮而紅啫！
講番部機，樣就真係唔錯嘞，Size重細過王子個「雕架」火機。可惜響聲太細，聽筒接收音量又唔係咁大，機面個超細Display要戴副漸進鏡先睇到，重有啲機大力㩒落去會出現斷線現象㖭！所以大家咪俾硬物頂親佢呀！